Шилдэг хакеруудаас бүрдсэн цэргийн анги бий гэдгээ Хятадууд хүлээн зөвшөөрлөө. Энэ тухай Бээжинд болсон Батлах хамгаалах яамны нэгэн мэдээллийн арга хэмжээний үеэр яамны хэвлэлийн төлөөлөгч Ген Яншен мэдэгдлээ гэж "Times” мэдээлжээ. Хөх арми гэж нэрлэгдсэн 30 хүнтэй энэ ангийн үндсэн зорилго нь Хятадын чөлөөлөх армийн аюулгүй байдлыг сайжруулах явдал гэж тэрээр мэдэгдсэн байна.
Улсын байгууллагуудын нууц мэдээллийг хулгайлах, бусниулах зорилгоор аж үйлдвэр, арми болон улсын компьютерийн төхөөрөмжүүдийн эсрэг кибер дайн хийх зорилгоор Хятад улс кибер нууц армитай болсон гэж барууны цэргийн болон тагнуулын албад үзэж байсан нь ийнхүү нотлогдлоо.

Томоохон хэмжээний кибер довтолгоон гарлаа л бол үүнийг Хятадын засгийн газрын хакеруудууд хийлээ гэж сэрдэх нь АНУ-д бараг уламжлал болчихсон. Үндэсгүй ч биш л дээ, хакеруудын ул мөр Хятад уруу л хөтлөөд байх болсон ажээ. Тэдний бай нь АНУ-ын арми, гадаад хэргийн, батлан хамгалахын болон эрчим хүчний яамдын, бизнесийн байгууллагууд, интернет үйлчилгээний компаниудын сүлжээ байна гэж АНУ-ын гадаад хэргийн яамнаас 2008 онд гаргасан нэгэн аюулгүй байдлын тухай илтгэлд дурдсан байв. Дэлхийн нефьт, эрчим хүч болон нефьт боловсруулах компаниуд уруу зорилготойгоор нууцаар довтлох явдал 2009 оны 11-р сараас явагдаж эхэлсэн гэж McAffee компани хэдхэн сарын өмнөөс анхааруулсан. Тэд маш тодорхой эдийн засгийн холбогдолтой мэдээлэл хайж байгаа ба довтолгооны ихэнхийн ул мөрийг Хятад улс уруу хүртэл мөрдөж чадсан байна. Гэвч хакерууд Засгийн газрын даалгавраар ажиллаа гэсэн нотолгоо гаргаж чадаагүй.

Хөх арми бол довтлох зорилгогүй гэж Хятадын албаныхан нотолсоор байгаа. Интернет бол хил хязгааргүй болохоор хэн нь дайсан, хэн нь довтлох гээд байгааг мэдэх аргагүй тул хөх арми өөрийгөө хамгаалахад л чиглэсэн, бид хэнийг ч довтлох гээгүй гэж Хятадууд тайлбарласаар байна.

Бусад улсыг довтлохоор цэргийн тусгай анги байгуулсан эсэхийг асуусан "Times” сонины асуултад хариулахдаа интернетийн аюулгүй байдал бол цэрэг дайнд ч нөлөөлөх олон улсын асуудал боллоо, тэгээд ч Хятад улс өөрөө довтолгоонд өртөх нь ихэслээ гэж мэдэгджээ. Иймэрхүү довтолгооны эсрэг сайн хамгаалагдсан гэдгээ нэгэн сургуулилтын үеэр Хятадууд нотолсон байна. Хятадын цэргийн ” PLA Daily” сайт нэгэн кибер сургуулилтын тухай мэдээлсэн байв. Энэ сургуулилтаар Хятадын сүлжээнд довтлох дөрөв дахин хүчирхэг хүчтэй тэмцэн амжилттай хамгаалж чадсан ажээ. Асар олон тооны авьяастнуудын дундаас шилэн сонгох боломжтой тул шигшмэл ангийн ажилтнууд бүгд гарамгай авьяастнууд байгаа гэж нэгэн генерал "Times” сонинд өгсөн ярилцлагадаа дурьджээ.

Гуандон дахь кибер дайчдын сургалтын төвийг барих болон тохижуулахад ихээхэн мөнгө гаргажээ. Арван жилийн өмнөөс төлөвлөж эхлэн, хоёр жилийн өмнөөс тусгай ангийг байгуулж эхэлсэн гэж "PLA Daily” мэдээлсэн. Хятадын цэргийнхний гэнэтийн энэ ил тод байдал бусад орнуудын цэргийн мэргэжилтнүүдийн санааг амраахгүй байгаа ажээ. Гайхалтай кибер довтолгоонуудын ул мөр нь Хятад уруу хөтлөөд байгаа тул аргагүй л дээ.

Тухайлбал:
• 2007 онд Хятадын троян программ Германы засгийн газрын хэрэг эрхлэх газрын компьютерээс олдсон
• 2008 онд Хятад хакерууд Цагаан ордны сүлжээнд нэвтэрсэн.
• 2010 онд хайлтын аварга машин болох Google маш өргөн хэмжээний довтолгоонд өртсөн ба Хятадаас хийсэн довтолгоо гэж таамаглаж байгаа.
• Үүнээс хэдхэн сарын дараа Энэтхэгийн болон Далай ламын засгийн газрыг тагнадаг Хятадын далд сүлжээг судлаачид илрүүлсэн.

Хятад кибер дайчидтай болсноо хүлээн зөвшөөрсөн нь улс орнуудыг тайвшруулахгүй ч хэрвээ одоо кибер довтолгоо гараад ул мөр нь Хятад уруу чиглэж одвол заавал засгийн газрын оролцоог нотлоно гэхгүйгээр хэнийг буруутгахаа мэдээд авах шиг боллоо.